அதிமுக பொதுக்குழுக் கூட்டத்திற்கு தடை விதிக்கக் கோரி தொடர்ந்த வழக்கில், தடை விதிக்க நீதிமன்றம் மறுப்பு தெரிவித்துள்ளது.
அதிமுக பொதுக்குழு
அதிமுகவின் பொதுக்குழு கூட்டம் ஜூன் 23ம் தேதி நடைபெற உள்ளது. அதில் ஒற்றை தலைமை மற்றும் பல முக்கிய பிரச்சனைகளை குறித்து விவாதிக்கப்படும் என்று எதிர்பார்க்கப்படுகிறது. இந்நிலையில், பொதுக்குழுக் கூட்டத்திற்கு தடை விதிக்கக் கோரி அதிமுக உறுப்பினர் எஸ்.சூரியமூர்த்தி என்பவர் சென்னை உரிமையியல் நீதிமன்றத்தில் வழக்கு தொடர்ந்தார்.
விதிகளுக்கு முரணானது
அந்த மனுவில், அதிமுகவில் ஜெயலலிதா மறைவுக்குப் பிறகு ஒருங்கிணைப்பாளராக ஓ.பன்னீர்செல்வமும், இணை ஒருங்கிணைப்பாளராக எடப்பாடி பழனிச்சாமியும் தேர்ந்தெடுக்கப்பட்டுள்ளனர் இது கட்சியின் விதிகளுக்கு முரணானது. ஜெயலலிதா பொதுச் செயலாளராக தான் பதவி வகித்து வந்தார். ஒருங்கிணைப்பாளர், இணை ஒருங்கிணைப்பாளர் என்ற பதவிகளை ஏற்றுக்கொண்டு தேர்தல் ஆணையம் இதுவரை எந்த ஆவணத்தையோ, கடிதத்தையோ கட்சிக்கு தரவில்லை என்று குறிப்பிட்டிருந்தார்.
தடை விதிக்க வேண்டும்
மேலும், கட்சியின் ஒருங்கிணைப்பாளர் மற்றும் இணை ஒருங்கிணைப்பாளர் என்ற எந்த ஒரு பதவியையும் உரிமையியல் நீதிமன்றம் அங்கீகரிக்கவில்லை. பொதுச் செயலாளர் பதவியை நீக்கியது சரிதான் என்றும் எந்த நீதிமன்றமும் தெரிவிக்கவில்லை. அதனால் ஜூன் 23ம் தேதி சென்னை வானகரத்தில் நடைபெறும் அதிமுக பொதுக்குழு கூட்டத்திற்கு தடை விதிக்க வேண்டும் என்று அந்த மனுவில் சூரியமூர்த்தி குறிப்பிட்டிருந்தார்.
அதிமுக மனு
இதனைத்தொடர்ந்து அதிமுக சார்பில் ஓ.பன்னீர்செல்வம், எடப்பாடி பழனிசாமி ஆகியோர் இணைந்து நிராகரிப்பு மனுத்தாக்கல் செய்தனர். அதில் மனுதாரர் சூரியமூர்த்தி அதிமுகவின் அடிப்படை உறுப்பினராக இல்லாததால் உட்கட்சி விவகாரத்தில் தலையிட முடியாது. அதனால் மனுவை நிராகரிக்க வேண்டும் என்று மனுவில் கூறப்பட்டிருந்தது.
தடை விதிக்க மறுப்பு
இந்நிலையில், வழக்கை விசாரித்த நீதிபதி, சூரியமூர்த்தி அதிமுகவின் அடிப்படை உறுப்பினராக இல்லை என்பதால் அதிமுக பொதுக்குழுக் கூட்டம் நடத்த தடை விதிக்க நீதிமன்றம் மறுப்பு தெரிவித்துள்ளது. மேலும், இந்த வழக்கு குறித்து சூரியமூர்த்தி பதிலளிக்க உத்தரவிட்டு வழக்கு விசாரணையை ஜூலை 22ம் தேதிக்கு தள்ளிவைத்தார்.