கடும் காற்று மாசுபாடு காரணமாக இந்தியர்களின் ஆயுள் சராசரியாக 5 ஆண்டுகள் குறையும் என்று பிரபல பல்கலைக்கழகம் நடத்திய ஆய்வில் தெரிய வந்துள்ளது.
காற்று மாசுபாடு
உலகம் முழுவதும் காற்று மாசுபாடு காரணமாக நாள்தோறும் ஆயிரக்கணக்கானோர் பாதிக்கப்படுகிறார்கள். காற்று மாசுபாட்டால் சுவாச கோளாறு ஏற்பட்டு உயிரிழந்திருக்கிறார்கள். இந்நிலையில், அமெரிக்காவை சேர்ந்த சிகாகோ பல்கலைக்கழகத்தின் ஏர் குவாலிட்டி லைஃப் இன்டெக் என்ற அமைப்பு, காற்றின் தரம் மனித வாழ்வு குறித்து ஆராய்ச்சி ஒன்றை இந்தியாவில் மேற்கொண்டது.
சிகாகோ பல்கலைக்கழகத்தின் ஆய்வு
அந்த ஆராய்ச்சியில், டெல்லியில் நிலவும் காற்று மாசுபாட்டின் காரணமாக இந்திய மக்களின் சராசரி ஆயுளில் சுமார் 5 வருடங்கள் குறைவதற்கான வாய்ப்பு உள்ளதாகத் தெரிவிக்கப்பட்டுள்ளது. மேலும், அமெரிக்காவின் சிகாகோ பல்கலைக்கழகத்தின் ஏர் குவாலிட்டி லைஃப் இன்டெக் அமைப்பு இது தொடர்பாக விரிவான ஆய்வு அறிக்கையை வெளியிட்டுள்ளது.
அறிக்கை
அந்த அறிக்கையில், ‘இந்தியாவின் கங்கை சமவெளி பகுதிதான் உலகிலேயே மிக மோசமான மாசடைந்த பகுதியாக உள்ளது. பஞ்சாப் தொடங்கி மேற்கு வங்கம் வரை நீளும் இந்த பகுதியைச் சேர்ந்த மக்கள் இந்த காற்று மாசு காரணமாக தங்கள் வாழ்நாளில் சராசரியாக 7.6 ஆண்டுகளை இழக்கும் அபாயம் உள்ளது. அதிக மாசு கொண்ட நாடுகளில் வங்கதேசத்துக்கு அடுத்தபடியாக இந்தியா இரண்டாவது இடத்தில் உள்ளது. இந்த காற்று மாசுக்கு தொழிற்சாலைகள், வாகனங்களில் இருந்து வெளியேறும் வாயு முக்கிய காரணமாகப் பார்க்கப்படுகிறது.
ஆயுட்காலம் குறையும்
2020ம் ஆண்டில் இந்தியாவில் கொரோனா காரணமாக பொது முடக்கம் அமல்படுத்தப்பட்டது. அப்போது பொது போக்குவரத்து முற்றிலும் முடங்கியது. இருப்பினும் நாட்டில் காற்று மாசு தொடர்ந்து அதிகரித்தே இருக்கிறது. மேலும், இந்த காற்று மாசு கருவில் வளரும் சிசு முதல் பெரியவர்கள் வரை அனைவருக்கும் பெரும் ஆபத்தை விளைவிக்கும். இதே நிலை நீடித்தால் இந்தியர்களின் ஆயுட்காலம் சராசரியாக 5 ஆண்டுகள் வரை குறையும் அபாயம் உள்ளது’ என்று அந்த அறிக்கையில் குறிப்பிடப்பட்டுள்ளது.
டெல்லியில் கடும் காற்று மாசுபாடு ஏற்பட்டதின் விளைவாக நிலக்கரி பயன்பாட்டை குறைக்க அரசு உத்தரவிட்டுள்ளது என்பது குறிப்பிடத்தக்கது.