12ம் வகுப்பு மாணவர்களுக்கான உயர்கல்விக்கு வழிகாட்டும் திட்டமான ‘கல்லூரி கனவு’ நிகழ்ச்சியை இன்று தொடங்கி வைத்தார் முதல்வர் ஸ்டாலின்.
‘கல்லூரி கனவு’ நிகழ்ச்சி
தமிழ்நாட்டில் 12-ம் வகுப்பு பொது தேர்வு முடிவுகள் கடந்த திங்கட்கிழமை வெளியானது. இந்நிலையில், ‘நான் முதல்வன்’ என்ற திட்டத்தின் கீழ் 12ம் வகுப்பு படித்த மாணவர்களுக்கான உயர் கல்விக்கு வழிகாட்டும் ‘கல்லூரி கனவு’ என்ற திட்டத்தை இன்று சென்னை நேரு உள் விளையாட்டரங்கில் தமிழக முதல்வர் மு.க.ஸ்டாலின் அறிமுகப்படுத்தி வைத்தார். இன்று காலை 9 மணிக்கு நடைபெற்ற இந்த நிகழ்ச்சியில் பட்டம் மற்றும் பட்டயப் படிப்புகளுக்கு கல்லூரிகளைத் தேர்வு செய்வது குறித்து வழிகாட்டுதல் தர ஏற்பாடு செய்யப்பட்டது.
மாணவர்கள் வழிகாட்டுதல்கள்
கல்லூரிகளை எப்படி தேர்ந்தெடுப்பது என்பதையும், மேற்படிப்பினை முடித்தவுடன் கிடைக்கும் வேலைவாய்ப்புகள் போன்றவை குறித்தும், புகழ்பெற்ற கல்வியாளர்கள் மற்றும் வல்லுநர்களை கொண்டு வழிகாட்டுதல்கள் வழங்கப்படும். அதன்படி கல்லூரிகளை எப்படி தேர்ந்தெடுப்பது என்பதையும், மேற்படிப்பினை முடித்தவுடன் கிடைக்கும் வேலைவாய்ப்புகள் போன்றவை குறித்தும், புகழ்பெற்ற கல்வியாளர்கள் மற்றும் வல்லுநர்களை கொண்டு வழிகாட்டுதல்கள் வழங்கப்பட உள்ளது.
இந்த நிகழ்ச்சிக்காக, உயர்கல்வித்துறை, தொழில்நுட்பக் கல்வி இயக்ககம், அண்ணா பல்கலைக்கழகம், வேளாண்மைப் பல்கலைக் கழகம், டாக்டர் அம்பேத்கார் சட்டப் பல்கலைக்கழகம், கல்லூரி இயக்குநரகம் தமிழ்நாடு திறன் மேம்பாட்டுக் கழகம் ஆகியவை சார்பில் அரங்குகள் அமைக்கப்பட்டுள்ளது.
ஹெச்.சி.எல் நிறுவனம்
ஹெச்.சி.எல் நிறுவனத்திற்கும் திறன் மேம்பாட்டு கழகம் இடையே புரிந்துணர்வு ஒப்பந்தம் செய்யப்பட்டுள்ளது. மேலும், ஹெச்.சி.எல் நிறுவனம் அரசுப் பள்ளி மாணவர்கள் 2,500 பேரை தேர்வு செய்து பயிற்சி, பணி ஆணை வழங்க முடிவு செய்யப்பட்டுள்ளது. ஹெச்.சி.எல் நிறுவனம் மாணவர்களுக்கு அளிக்கும் பயிற்சிக்கான முழு செலவையும் தமிழக அரசே ஏற்க உள்ளது. ‘கல்லூரி கனவு’ நிகழ்ச்சி ஜூன் 29, 30, ஜூலை 1, 2 ஆகிய தேதிகளில் அனைத்து மாவட்டங்களில் நடைபெறும் என அறிவிக்கப்பட்டுள்ளது.