அதிமுகவிற்கு ஒற்றை தலைமை தான் சரியாக இருக்கும். திறமை மிக்கவர் பொது செயலாளராக வரவேண்டும் என பாஜக நயினார் நாகேந்திரன் தெரிவித்துள்ளார்.
சர்வதேச யோகா தினம்
இன்று சர்வதேச யோகா தினத்தை முன்னிட்டு திருநெல்வேலி சங்கர்நகரில் உள்ள தனியார் பள்ளியில் பாரதிய ஜனதா கட்சி சார்பில் யோகா நிகழ்ச்சிக்கு ஏற்பாடு செய்யப்பட்டது. இந்த நிகழ்ச்சியில் தமிழக சட்டமன்ற குழு பாஜக தலைவர் நயினார் நாகேந்திரன் சிறப்பு அழைப்பாளராக கலந்து கொண்டார்.
பாஜக எம்.எல்.ஏ நயினார் நாகேந்திரன்
யோகா நிகழ்ச்சியில் கலந்து கொண்ட பின்னர் பாஜக நயினார் நாகேந்திரன் செய்தியாளர்களை சந்தித்தார். அவர் பேசுகையில், ‘63 கலைகளும் உருவான நாடு பாரத நாடு. சுவாமி விவேகானந்தர் வாக்கு இப்போது நடந்து வருகிறது. உலக நாடுகளில் எங்கும் இல்லாத பெருமை இந்திய நாட்டுக்கு இருக்கிறது.
பிரதமர் மோடி யோகா குரு
கலாச்சாரம் பண்பாடு உள்ளிட்டவைகளின் காரணமாக இந்தியாவை உலக நாடுகள் திரும்பி பார்க்கின்றன. உலகத்தில் உள்ள தலைவர்கள் அனைவரின் யோகா குருவாக பாரத பிரதமர் மோடி திகழ்ந்து வருகிறார். காங்கிரஸ் கட்சி நாட்டு மக்களுக்கு நன்மை செய்யும் கட்சியாக இல்லை. காங்கிரஸ் கட்சி ‘கழுதை தேய்ந்து கட்டெரும்பான கதையாக’ அக்கட்சி இல்லாமல் போய்விட்டது. திமுகவுடன் கூட்டணி இல்லை என்றால் தமிழகத்திலும் காங்கிரஸ் இல்லாமல் போயிருக்கும் என்றார்.
ஒற்றை தலைமை
அதிமுகவின் ஒற்றை தலைமை குறித்து கேள்வி எழுப்பப்பட்டது. அதிமுக என்பது மிகப்பெரிய இயக்கம் என தெரிவித்த அவர், ‘ஏழை எளிய மக்களுக்காக எம்.ஜி.ஆரால் உருவாக்கப்பட்டு, ஜெயலலிதாவால் வளர்க்கப்பட்ட கட்சி. கட்சியின் தலைமைப் பொறுப்புக்கு தகுதியும் திறமையும் உள்ளவர்கள் தொண்டர்களின் மனநிலைக்கேற்ப நல்ல தலைவராக வர வேண்டும். ஓபிஎஸ், இபிஎஸ் இருவரில் யார் நல்லவரோ, தகுதியானவாரோ அவர் வரவேண்டும்.
அதிமுக கட்சியின் விதி 20 பி படி அனைத்து அழைப்பாளர்கள் கலந்துகொள்ள வேண்டும். பஞ்சாயத்து செயலாளர் தொடங்கி பல உறுப்பினர்கள் எம்.ஜி.ஆர். காலம் முதல் பொதுக் குழுவில் அனுமதிக்கப்பட்டுள்ளனர். அதிமுகவுக்கு திறமை மிக்க ஒரு தலைமை வேண்டும். ஒற்றை தலைமை தான் சரி’ என பாஜக எம்.எல்.ஏ நயினார் நாகேந்திரன் தெரிவித்துள்ளார்.
