கிரிப்டோகரன்சியின் மிக முக்கிய தொழில்நுட்பமே blockchain தொழில்நுட்பம் தான். அதீத பாதுகாப்பு காரணமாக தற்போது பிளாக்செயின் தொழில்நுட்பம் பெரிய அளவில் விரும்பத்தகுந்த ஒன்றாக உள்ளது.
Blockchain என்றால் என்ன?
“Blockchain is a distributed, decentralized, public ledger”. பிளாக்செயின் என்பது பல்வேறு இடங்களில் பராமரிக்கப்படுகின்ற பரிவர்த்தனை கணக்குப்புத்தகம் என பொருள்.
உதாரணத்திற்கு நாம் வங்கிகளில் மேற்கொள்ளும் பண பரிவர்த்தனை குறித்த தகவல்கள் அனைத்தும் வங்கியின் சர்வரில் (ஒரே இடம்) சேமிக்கப்பட்டு இருக்கும். ஆனால் blockchain தொழில்நுட்பத்தில் பல்வேறு இடங்களில் ஒரேவிதமான தகவல்கள் சேமிக்கப்பட்டு இருக்கும்.
ஒரு பரிவர்த்தனை நடக்கும் போது அது குறித்த விவரம் “block” ஆக அனுப்பப்படும். அந்த block இல் இருக்கும் தகவல்களை என்கிரிப்ட் செய்து ஒவ்வொரு பெட்டிக்கும் “hash” என்ற ஒரு அடையான எண்ணை கொடுப்பார்கள். ஒவ்வொரு பெட்டியும் தனித்துவமான hash ஐ கொண்டிருக்கும்.
இரண்டாவது block இல் முதல் block இன் hash பதிவிடப்பட்டு இருக்கும். இப்படித்தான் ஒவ்வொரு பெட்டிக்கும் இருக்கும். இப்படி பல block ஒன்றோடு ஒன்று செயின் போல இணைந்து இருப்பதனால் தான் இதனை Blockchain என அழைக்கிறோம்.
பிளாக்செயின் தொழில்நுட்பத்தில் இரண்டு முக்கியமான பிரிவுகள் உண்டு. அவைதான் public மற்றும் private பிளாக்செயின். கிரிப்டோகரன்சியில் இவற்றில் எந்த பிரிவு பயன்படுத்தப்படுகிறதோ அதனைப்பொறுத்து அந்த கிரிப்டோகரன்சியை public அல்லது private என பிரிக்கலாம்.
Public Blockchain :
Public Blockchain என்பது முற்றிலும் வெளிப்படையான Blockchain அமைப்பு. அதிலே யார் வேண்டுமானாலும் சேரலாம். அந்த தகவல்களை பார்க்கலாம், படிக்கலாம். அதில் பங்களிப்பும் செய்யலாம்.
இவர்கள் தான் செய்ய வேண்டும் என்ற கட்டுப்பாடு இல்லை. எனவே இதனை Public Blockchain என அழைக்கிறோம். தற்போது பிட்காயினில் Public Blockchain தொழில்நுட்பம் பயன்படுத்தப்படுகிறது .
இது போன்று மக்களால் நிர்வகிக்கப்பட்டு மக்களால் சரிபார்க்கப்படும் Blockchain அமைப்பு முறையில் உருவாக்கப்பட்டுள்ள கிரிப்டோகரன்சிகள் அனைத்தும் Public Cryptocurrency என அழைக்கப்படும்.
எப்படி ஒருவர் தானாகவே இதில் பங்கேற்று பங்களிப்பு செய்வார்? அவருக்கு ஏதாவது கிடைத்தால் தானே செய்வார்? அதற்காகத்தான் Public Cryptocurrency கள் அனைத்திலும் இன்சென்டிவ்ஸ் வழங்கும் முறை இருக்கிறது. இதனைத்தான் நாம் மைனிங் என அழைக்கிறோம். இதனால் தான் பலரும் இதிலே தானாகவே இணைகிறார்கள்.
மக்கள் தான் இதை கட்டுப்படுத்துகிறார்கள் என்ற உறுதி கிடைத்தாலும் கூட Public Cryptocurrency கள் உருவாவதற்கு அதிக ஆற்றல் தேவைப்படுகிறது.
Private Blockchain :
இந்த பிளாக்செயின் தொழில்நுட்பத்தில் குறிப்பிட்ட அமைப்பு அல்லது நிறுவனத்தால் அனுமதிக்கப்பட்ட நபர்களால் மட்டுமே பங்களிப்பு செய்திட முடியும், பரிவர்த்தனை தகவல்களை பெற முடியும். Invitation இல்லாதவர்களால் இதிலே இணைய முடியாது.
இதிலே பங்கேற்கும் அனுமதிக்கப்பட்ட நபர்களிடம் மட்டுமே பரிவர்த்தனை தகவல்கள் அனைத்தும் இருக்கும் [Shared Ledger]. சில Private கிரிப்டோகரன்சிகளிலும் மைனிங் என்பது இருக்கிறது. ஆனால் எவ்வளவு ரிவார்ட்ஸ் என்பதையெல்லாம் குறிப்பிட்ட ஒரு அமைப்பு தான் தீர்மானிக்கும்.
இதுதவிர Permissioned Blockchain என்ற ஒரு பிரிவும் உள்ளது. Public Blockchain மற்றும் Private Blockchain இந்த இரண்டிலும் இருக்கக்கூடிய சில வசதிகளை கலந்து இதனை உருவாக்கி இருப்பார்கள்.