சமீபத்தில் திரைக்கு வந்து ரசிகர்களிடம் பெரும் வரவேற்பை பெற்ற படம் விக்ரம். இத்திரைப்படத்தின் ஓடிடி வெளியிடு குறித்த தகவல் தற்போது வெளியாகியுள்ளது.
ரசிகர்களின் எதிர்பார்ப்பு
சமீபகாலமாக தமிழ் சினிமாவில் பெரிதளவில் எந்த படங்களும் வெற்றி பெறவில்லை. மேலும், மிகுந்த எதிர்பார்ப்பில் வெளியான ரஜினியின் அண்ணாத்த, அஜித்தின் வலிமை, விஜய்யின் பீஸ்ட் போன்ற படங்களும் மக்களிடையே கலவையான விமர்சனங்களையே பெற்றது. இதனால் மற்ற மொழி படங்கள் தமிழ் நாட்டில் சக்கைபோடு போட்டது. அதனால் ஒட்டுமொத்த தமிழ் திரையுலகும் கமலின் விக்ரம் படத்தை தான் ஆவலாக எதிர்நோக்கி காத்திருந்தது.
5 மொழிகளில் வெளியிடு
இந்நிலையில், கடந்த ஜூன் 3ம் தேதி விக்ரம் படம் வெளியானது. கமல்ஹாசனின் ராஜ்கமல் பிலிம்ஸ் நிறுவனம் தயாரிப்பில் பிரம்மாண்டமாக உருவான படம் விக்ரம். லோகேஷ் கனகராஜ் இயக்கியிருந்த இப்படத்தில் நடிகர் கமல்ஹாசனுடன் விஜய் சேதுபதி, பகத் பாசில், சூர்யா, காளிதாஸ் ஜெயராம் போன்ற மிகப்பெரிய நட்சத்திர பட்டாளமே நடித்திருந்தது. அனிருத் இசையமைத்திருந்த இப்படத்திற்கு கிரீஷ் கங்காதரன் ஒளிப்பதிவு செய்திருந்தார். இப்படம் தமிழ், தெலுங்கு, இந்தி, மலையாளம், கன்னடம் ஆகிய 5 மொழிகளில் வெளியானது. படம் விமர்சன ரீதியாகவும், வசூல் ரீதியாகவும் நல்ல வரவேற்பை பெற்றுள்ளது.
வசூல் சாதனை
மேலும், விக்ரம் படம் பாக்ஸ் ஆபிஸில் இதுவரை சுமார் 350 கோடி வரை வசூல் செய்துள்ளதாக தகவல்கள் வெளியாகியுள்ளது. தமிழகத்தில் மட்டும் இதுவரை சுமார் 155 கோடி வரை வசூல் செய்துள்ளது. தமிழகத்தில் வசூலில் முதலிடத்தில் இருந்த பாகுபலி 2 படத்தின் சாதனையை கமலின் விக்ரம் திரைப்படம் முறியடித்துள்ளது. இதனால் தமிழகத்தில் இதுவரை வெளியான படங்களில் அதிக வசூல் ஈட்டிய படமாக விக்ரம் உருவெடுத்துள்ளது.
ஓடிடி வெளியிடு
இந்நிலையில், விக்ரம் படத்தின் ஓடிடி உரிமையை டிஸ்னி ப்ளஸ் ஹாட் – ஸ்டார் நிறுவனம், 98 கோடி ரூபாய்க்கு கைப்பற்றியுள்ளதாக கூறப்படுகிறது. மேலும், படத்தின் சாட்டிலைட் உரிமையை விஜய் தொலைக்காட்சி பெற்றுள்ளது. வரும் ஜூலை 8ம் தேதி ஓடிடியில் ‘விக்ரம்’ படம் வெளியாகும் என்று தகவல்கள் வெளியாகியுள்ளது. இது தொடர்பான அதிகாரபூர்வ அறிவிப்பு விரைவில் வெளியாகும் என்று எதிர்பார்க்கபடுகிறது.
