துணிவு பொங்கல்
நடிகர் அஜித் குமார் நடிப்பில், ரசிகர்களின் ஆரவாரத்துடன் தமிழகமெங்கும் நள்ளிரவு 1 மணியளவில் துணிவு படத்தின் முதல் காட்சி திரையிடப்பட்டது. எச்.வினோத் இயக்கியுள்ள இப்படத்தில் சமுத்திரக்கனி, பகவதி பெருமாள், மகாநதி சங்கர், ஜான் கொகேன், மஞ்சு வாரியர் ஆகியோர் நடித்துள்ளனர். இப்படத்திற்கு ஜிப்ரான் இசையமைக்க, நீரவ் ஷா ஒளிப்பதிவு செய்துள்ளார். ரசிகர்களின் பெரும் எதிர்பார்ப்புக்கு மத்தியில் வெளியான இத்திரைப்படம் நல்ல வரவேற்பை பெற்று வருகிறது.
கதைச் சுருக்கம்
சென்னையில் இயங்கி வரும் ஒரு வங்கியை கொள்ளையடிக்க வரும் கும்பலும், கொள்ளைக்கான நோக்கமும் தான் பிரதான கதை. விறுவிறுப்பாக நகரும் முதல் பாதியின் திரைக்கதை, இரண்டாம் பாதியில் சொல்லப்படும் சமூக கருத்து என தனது வழக்கமான பாணியில் இறங்கி அடித்துள்ளார் இயக்குனர் எச்.வினோத். மேலும், வலிமை படத்தில் விட்டதை இந்த படத்தில் பிடிக்க அவர் எடுத்துக்கொண்ட மெனக்கெடல் திரையில் தெரிகிறது.
படம் எப்படி இருக்கு?
மங்காத்தா படத்திற்கு பிறகு அஜித்தின் வில்லத்தனமான நடிப்பும், அவரின் நடன அசைவுகளும் ரசிகர்களை கொண்டாட வைக்கிறது. மஞ்சு வாரியர் வழக்கமான கதாநாயகியாக இல்லாமல்போனது படத்தின் கூடுதல் பலம். மற்றபடி துணை நடிகர்கள் அவர்களுக்கு கொடுக்கப்பட்ட கதாபாத்திரத்தை சரியாக செய்துள்ளனர்.
மேலும், எச்.வினோத்தின் அரசியல் வசனங்கள் அங்கங்கே கவனம் ஈர்க்கிறது. அதே நேரத்தில் படத்தில் தொடர்ச்சியாக கொடுக்கப்படும் தகவல்கள் ரசிகர்களை தொய்வடைய செய்கிறது. ஜிப்ரானின் பாடல்களும், பின்னணி இசையும் திரையரங்கை தெறிக்க விடுகிறது. மொத்தத்தில் இந்த துணிவு பொங்கலுக்கு வெளியான தீபாவளி.