நாடு முழுவதும் சமத்துவ கிராமங்கள் அமைக்கப்படுமா ? – பதில் கூறிய மத்திய அமைச்சர் !

இந்திய நாடு முழுவதும் சமத்துவ கிராமங்கள் அமைக்கப்படுமா என மக்களவையில் கேள்வி எழுப்பப்பட்டது .

சமத்துவ கிராமங்கள்

நாடு முழுவதும் சமத்துவ கிராமங்கள் அமைக்கும் திட்டம் உள்ளதா என விழுப்புரம் எம்.பி ரவிக்குமார் மக்களவையில் நேற்று கேள்வி எழுப்பினார். கேள்வியில், தமிழ்நாட்டில் 200க்கும் மேற்பட்ட சமத்துவபுரங்களை உருவாக்கி அனைத்து சாதியினரும் சேர்ந்து வாழும் வசதிகளை தமிழக அரசு உருவாகியுள்ளது. இந்நிலையில், ‘பிரதான் மந்திரி ஆவாஸ் யோஜனா’ திட்டத்தின் கீழ் இதேபோன்று நாடு முழுவதும் சமத்துவ கிராமங்களை அமைக்கும் திட்டம் மத்திய அரசிடம் உள்ளதா என கேள்வி எழுப்பினார்.

இதற்கு பதில் கூறிய மத்திய ஊரக வளர்ச்சித் துறை இணை அமைச்சர் சாத்வீ நிரஞ்சன் ஜோதி, அனைவருக்கும் வீடு என்ற இலக்கை அடைவதற்காக கிராமப்புறங்களில் ‘பிரதான் மந்திரி ஆவாஸ் யோஜனா கிராமீன்’ திட்டத்தின் கீழ் 2 கோடியே 95 லட்சம் வீடுகளை கட்டுவதற்கு இலக்கு நிர்ணயிக்கப்பட்டுள்ளது. இத்திட்டத்தின் கீழ் நாட்டின் அனைத்து கிராமப் பகுதிகளுக்கும் சாதி பாகுபாடின்றி வீடுகள் வழங்கப்படுகின்றன என்றும் இந்தியாவின் அனைத்து கிராமங்களிலும் சமமான வளர்ச்சி இருக்க வேண்டும் என்பதே மத்திய அரசின் இலக்கு என்றும் கூறினார். மேலும், சமத்துவ கிராமங்கள் அமைக்கும் திட்டம் ஒன்றிய அரசிடம் இல்லை எனவும் பதிலளித்துள்ளார்.