நேஷனல் ஹெரால்டு பத்திரிகை வழக்கில் தொடர்ந்து மூன்றாவது நாளாக ராகுல் காந்தியை அமலாக்கத்துறை விசாரித்து வருகிறது. இதனை கண்டித்து தமிழக காங்கிரஸ் கட்சியினர் ஆர்ப்பாட்டதில் ஈடுபட்டனர்.
நேஷனல் ஹெரால்டு காங்கிரஸ் போராட்டம்
இந்தியாவில் நேஷனல் ஹெரால்டு பத்திரிகை வழக்கில் தொடர்ந்து மூன்றாவது நாளாக ராகுல் காந்தியை அமலாக்கத்துறை விசாரித்து வருகிறது. இதனை கண்டித்து தமிழக காங்கிரஸ் கட்சி சார்பாக ஆர்ப்பாட்டம் நடத்தப்பட்டது. ஆர்ப்பாட்டத்தில் தமிழக தலைவர் கே.எஸ். அழகிரி தலைமை தாங்கினார். மேலும் தினேஷ் குண்டாராவ், செல்வப்பெருந்தகை, ஈ.வி.எஸ் இளங்கோவன், தங்கபாலு மற்றும் 500க்கும் மேற்பட்ட காங்கிரஸ் தொண்டர்கள் கலந்துகொண்டனர்.
கே.எஸ். அழகிரி பேச்சு
அப்போது மேடையில் பேசிய கே.எஸ். அழகிரி, ‘ சென்னையில் தொடர்ந்து மூன்று நாட்களாக போராட்டம் நடைபெறுகிறது. நாளை மாவட்ட தலைநகரங்களில் ஆர்ப்பாட்டம் நடைபெறும். மாவட்ட தலைவர்களை கசக்கி பிழிந்து இந்த ஆர்ப்பாட்டம் நடைபெற்று வருகிறது. முதல்வர், துரைமுருகனுடன் அவ்வப்போது ஆளுநர் மாளிகைக்கு செல்கிறார்.
முற்றுகை
நாங்கள் ஆளுநர் மாளிகை கேட் வரை மட்டும் செல்கிறோம். காவல்துறையினர் எங்களை தடுக்க வேண்டாம். ஆளுநர் பதவி மீது எங்களுக்கு மரியாதை உண்டு. நேசனல் ஹெரால்டு என்பது காங்கிரஸ் கட்சியின் சொத்து. அதை ஆர்.எஸ்.எஸ், பாஜக பெயரில் எழுதித் தர முடியாது.
அறக்கட்டளை விதிகள்படியே நேசனல் ஹெரால்ட் பங்குகளை கட்சிப் பெயரில் இல்லாமல் கட்சியினர் பெயரில் வைத்துள்ளோம். இதில் எந்த ஒளிவு மறைவும் இல்லை. காங்கிரஸ் நாத்திக கட்சியோ, இந்து மத எதிர்ப்பு கட்சியோ அல்ல. சாதி, மத வேறுபாடுகளை எதிர்க்கும் கட்சி. இந்திய எல்லைக்குள் வாழும் அனைவரும் இந்தியரே என்றார் காந்தி.
பாஜக வீழும்
வேறொரு மதம் குறித்து கருத்து சொல்லக் கூடாது. அந்த மதத்துடன் சண்டை போடுவது தவறு. உத்தரப் பிரதேசத்தில் போராட்டம் நடத்திய இசுலாமியர்களின் வீடுகளை பொக்லைன், ஜேசிபி வைத்து இடித்துள்ளனர். அது ஆக்கிரமிப்பு வீடு என பல வருடமாக ஆட்சி நடத்திய பாஜக அரசுக்கு இப்போதுதான் தெரியுமா..?
மேகதாது அணைக்கு மத்திய நீர்வளத்துறை வரைவுத் திட்ட அனுமதி கொடுத்ததே தவறு. மேகதாது அணையால் காவிரி டெல்டா பாலைவனமாகப் போகிறது. கொள்கைதான் வெல்லும். பாஜகவின் சந்தர்ப்பவாதம் ஒருபோதும் வெற்றி பெறாது’ என சென்னையில் நடந்த போராட்டத்தில் இவ்வாறு தெரிவித்துள்ளார்.