வரும் ஏப்ரல் 1ம் தேதி முதல் புதிய வருமான வரி விதிகள் 2026 அமலுக்கு வர உள்ளது. இதனால், வருமான வரித் தாக்கல் (ஐடிஆர்) முறையில் குறிப்பிடத்தக்க மாற்றங்கள் வரவுள்ளன.
குறிப்பாக மறுவடிவமைப்பு செய்யப்பட்ட ஐடிஆர் படிவங்கள், ‘படிவம் 16’-க்கு பதில் புதிய ‘படிவம் 130′ அறிமுகம் மற்றும் துல்லியத் தன்மையை மேம்படுத்த தானியங்கி தாக்கல் முறை உள்ளிட்ட புதிய நடைமுறைகள் அமலுக்கு வர உள்ளன. புதிய வரி கட்டமைப்பின் கீழ் முக்கிய மாற்றமாக, நிறுவனங்களால் வழங்கப்படும் ‘படிவம் 16′ நீக்கப்பட்டு, அதற்குப் பதில் ‘படிவம் 130’ அறிமுகப்படுத்தப்படுகிறது.
இது சம்பளம் பெறும் ஊழியர்கள் மற்றும் ஓய்வூதியதாரர்களுக்கு நிறுவனத்தால் வழங்கப்படும் வருடாந்திர டிடிஎஸ் சான்றிதழ் ஆகும். இதில் ஈட்டிய சம்பளம், பிடித்தம் செய்யப்பட்ட வரி, அரசுக்குச் செலுத்தப்பட்ட வரி மற்றும் அனுமதிக்கப்பட்ட வரி விலக்குகள் பற்றிய விவரங்கள் இருக்கும். சம்பளத்தில் இருந்து வரி பிடித்தம் செய்யப்பட்டு அரசுக்கு செலுத்தப்பட்டதற்கான ஆவணமாக இந்த படிவம் விளங்கும்.
வருமான வரிச் சட்டம் 2025, பிரிவு 402(39)-ன்படி, குறிப்பிட்ட மூத்த குடிமக்கள் ஈட்டும் வட்டி வருமானமும் இதில் அடங்கும். படிவம் 130-ஐ கைகளால் பூர்த்தி செய்ய முடியாது. இது டிரேசஸ் (TRACES) இணையதளம் வழியாக மட்டுமே உருவாக்கப்படும்.