ஐசிசி டி20 உலகக் கோப்பை கிரிக்கெட் தொடரில் டி’ பிரிவில் நடைபெற்ற லீக் ஆட்டத்தில் ஆப்கானிஸ்தான் அணிக்கு எதிராக தென் ஆப்பிரிக்க அணி 2-வது சூப்பர் ஓவரில் போராடி வெற்றி பெற்றது.
அகமதாபாத்தின் நரேந்திர மோடி மைதானத்தில் நடைபெற்ற இந்த ஆட்டத்தில் முதலில் பேட் செய்த தென் ஆப்பிரிக்க அணி 6 விக்கெட்கள் இழப்புக்கு 187 ரன்கள் குவித்தது.
தொடக்க வீரரும் கேப்டனுமான எய்டன் மார்க்ரம் 5 ரன்களில் ஃபசல்ஹக் ஃபரூக்கி பந்தில் ஆட்டமிழந்தார். இதன் பின்னர் ரியான் ரிக்கெல்டன், குயிண்டன் டி காக்குடன் இணைய பவர்பிளேவில் 43 ரன்கள் சேர்க்கப்பட்டன. இதன் பின்னர் இந்த ஜோடி ஆப்கானிஸ்தான் பந்துவீச்சை வெளுத்து வாங்கியது. இதனால் 10.2 ஓவர்களில் தென் ஆப்பிரிக்க அணி 100 ரன்களை எட்டியது.
குயிண்டன் டி காக் 34 பந்துகளில், 3 சிக்ஸர்கள், 5 பவுண்டரிகளுடன் தனது 19-வது அரை சதத்தையும், ரியான் ரிக்கெல்டன் 23 பந்துகளில், 3 சிக்ஸர்கள், 5 பவுண்டரிகளுடன் தனது 4-வது அரை சதத்தையும் விளாசினர். இந்த ஜோடியின் அதிரடியால் தென் ஆப்பிரிக்க அணி 210 முதல் 220 ரன்கள் வரை குவிக்கக்கூடும் என எதிர்பார்க்கப்பட்டது.
ஆனால் இவர்கள் இருவரையும் 13-வது ஓவரை வீசிய ரஷித் கான் ஆட்டமிழக்கச் செய்தார். குயிண்டன் டி காக் 41 பந்துகளில், 3 சிக்ஸர்கள், 5 பவுண்டரிகளுடன் 59 ரன்களும், ரியான் ரிக்கெல்டன் 28 பந்துகளில், 4 சிக்ஸர்கள், 5 பவுண்டரிகளுடன் 61 ரன்களும் விளாசிய நிலையில் ரஷித் கான் பந்தில் ஆட்டமிழந்தனர். இந்த ஜோடி 2-வது விக்கெட்டுக்கு 114 ரன்கள் குவித்தது.
ரியான் ரிக்கெல்டன் ஆட்டமிழந்தபோது ஸ்கோர் 13 ஓவர்களில் 127 ஆக இருந்தது. இதன் பின்னர் தென் ஆப்பிரிக்க அணியின் ரன் குவிப்பை வேகம் குறைந்த பந்துகளை வீசி ஆப்கானிஸ்தான் அணியின் பந்து வீச்சாளர்கள் வெகுவாக கட்டுப்படுத்தினர். கடைசி 7 ஓவர்களில் தென் ஆப்பிரிக்க அணி 60 ரன்கள் சேர்த்தது.
டெவால்ட் பிரேவிஸ் 19 பந்துகளில், 23 ரன்களும், டேவிட் மில்லர் 15 பந்துகளில், 20 ரன்களும், மார்கோ யான்சன் 7 பந்துகளில் 16 ரன்களும் சேர்த்தனர். ஆப்கானிஸ்தான் அணி சார்பில் அஸ்மதுல்லா ஓமர்ஸாய் 3 விக்கெட்கள் வீழ்த்தினார். ரஷித் கான் 4 ஓவர்களை வீசி 28 ரன்களை விட்டுக்கொடுத்து 2 விக்கெட்களை கைப்பற்றினார்.
188 ரன்கள் இலக்குடன் பேட் செய்த ஆப்கானிஸ்தான் அணி ஒரு கட்டத்தில் 16 ஓவர்களில் 6 விக்கெட்கள் இழப்புக்கு 147 ரன்கள் குவித்தது. தனது 13-வது அரை சதத்தை அடித்த ரஹ்மனுல்லா குர்பாஸ் 42 பந்துகளில், 7 சிக்ஸர்கள், 4 பவுண்டரிகளுடன் 84 ரன்கள் விளாசிய நிலையில் கேசவ் மகாராஜ் பந்தில் ஆட்டமிழந்தார். இப்ராகிம் ஸத்ரன் 12, குல்பாதின் நயீப் 0, செடிகுல்லா அடல் 0, டார்விஷ் ரசூலி 15, முகமது நபி 5 ரன்களில் வெளியேறினர்.
அஸ்மதுல்லா ஓமர்ஸாய், ரஷித் கான் களத்தில் நின்ற நிலையில் கடைசி 4 ஓவர்களில் வெற்றிக்கு 41 ரன்கள் தேவையாக இருந்தன. காகிசோ ரபாடா வீசிய 17-வது ஓவரில் ரஷித் கான் 2 பவுண்டரிகளை விரட்ட இந்த ஓவரில் 11 ரன்கள் சேர்க்கப்பட்டன. இதனால் 18 பந்துகளில் 30 ரன்கள் தேவை என்ற நிலை உருவானது.
இந்த சூழ்நிலையில் 18-வது ஓவரை வீசிய லுங்கி நிகிடி, அஸ்மதுல்லா ஓமர்ஸாயை (22) அவுட்டாக்கி திருப்புமுனையை ஏற்படுத்தினார். அஸ்மதுல்லா ஓமர்ஸாய்லாங் ஆன் திசையில் சிக்ஸரை நோக்கி அடித்த பந்தை எல்லைக்கோட்டுக்கு அருகில் வைத்து டிரிஸ்டன் ஸ்டப்ஸ் கேட்ச் செய்தார். ஆனால் அவர், நிலை தடுமாறி கோட்டுக்கு வெளியே ஒரு காலை வைக்க நேரிட்ட போது பந்தை மைதானத்துக்குள் சற்று உயரமாக வீசிவிட்டு மீண்டும் உள்ளே வந்து பிடித்து அசத்தினார்.
இந்த ஓவரில் நிகிடி 6 ரன்களை மட்டுமே வழங்கி ஆப்கானிஸ்தான் அணியின் நெருக்கடியை அதிரிகரித்தார். அடுத்த ஓவரை வீசிய மார்கோ யான்சன், ரஷித் கானை (20) ஆட்டமிழக்கச் செய்தார். இதையடுத்து களமிறங்கிய நூர் அகமது 4-வது பந்தில் சிக்ஸர் அடித்தார். ஆனால் கடைசி பந்தில் முஜீப் உர் ரஹ்மான் (0) ரன் அவுட் ஆனார். இதனால் ஆட்டத்தில் பரபரப்பு அதிகமானது.
கைவசம் ஒரு விக்கெட் மட்டுமே இருக்க ரபாடா வீசிய கடைசி ஓவரில் வெற்றிக்கு 13 ரன்கள் தேவைப்பட்டன.முதல் பந்தை ரபாடா நோபாலாக வீசினார். இதற்கு மாற்றாக வீசப்பட்ட அடுத்த பந்து வைடானது. இதனால் ப்ரீஹிட் தொடர்ந்தது. ஆனால் நூர் அகமது அடித்த பந்தை லாங் ஆஃப் திசையில் யான்சன் தவறவிட்டார்.
எனினும் ரன் ஓடப்படவில்லை. 2-வது பந்தை டீப் பேக்வேர்டு ஸ்கொயர் திசையில் நூர் அகமது சிக்ஸருக்கு பறக்கவிட்டார். இதனால் 4 பந்துகளில் 5 ரன்களே தேவையாக இருந்ததால் ஆப்கானிஸ்தான் அணி எளிதாக வெற்றி பெறும் என எதிர்பார்கப்பட்டது. 3-வது பந்தில் ரன் ஏதும் சேர்க்கப்படவில்லை. 4-வது பந்தில் நூர் அகமது 2 ரன்கள் சேர்த்தார். ஆனால் இதை ரபாடா நோபாலாக வீசியிருந்தார்.
இதனால் ஆப்கானிஸ்தானுக்கு கூடுதலாக ஒரு ரன் கிடைத்தது. 3 பந்துகளில் 2 ரன்கள் தேவை என்ற நிலையில் 4-வது பந்தில் நூர் அகமது 2 ரன்கள் ஓட முயன்றார். அப்போது மறுமுனையில் இருந்த ஃபசல்ஹக் ஃபரூக்கி (0) நூலிழையில் ரன் அவுட் ஆனார். 19.4 ஓவர்களில் ஆப்கானிஸ்தான் அணி 187 ரன்களுக்கு ஆட்டமிழந்ததால் போட்டி ‘டை’ ஆனது. நூர் அகமது 15 ரன்கள் சேர்த்திருந்தார்.
ஃபசல்ஹக் ஃபரூக்கி 2-வது ரன்னுக்கு விரைவாகவோ ஓடியிருந்தாலோ அல்லது டைவ் அடித்து கிரீஸை தொட்டிருந்தாலோ ரன் அவுட் ஆவதில் இருந்து தப்பித்திருக்க முடியும். அவரது மட்டை கீரிஸை தொடாமல் காற்றில் இருந்ததால் ஆட்டமிழக்க நேரிட்டது. 2 பந்துகள் மீதம் இருந்த நிலையிலும் ஆப்கானிஸ்தான் அணி வெற்றிக் கோட்டை கட்ட முடியாதது ரசிகர்களுக்கு ஏமாற்றமாக அமைந்தது.
இதையடுத்து வெற்றியை தீர்மானிக்க சூப்பர் ஓவர் கடைபிடிக்கப்பட்டது. இதில் முதலில் பேட் செய்த ஆப்கானிஸ்தான் அணி 17 ரன்கள் சேர்த்தது. நிகிடி வீசிய இந்த ஓவரில் அஸ்மதுல்லா ஓமர்ஸாய் 2 பவுண்டரிகள், ஒரு சிக்ஸர் விளாசினார். இதையடுத்து 18 ரன்கள் எடுத்தால் வெற்றி என்ற நிலையில் தென் ஆப்பிரிக்கா விளையாடியது. டேவிட் மில்லர், டெவால்ட் பிரேவிஸ் களமிறங்கினார்.
ஃபசல்ஹக் ஃபரூக்கி வீசிய முதல் பந்தில் மில்லர் ஒரு ரன் சேர்த்தார்.அடுத்த பந்தை சிக்ஸருக்கு விளாசிய பிரெவிஸ் 3-வது பந்தில் ஆட்டமிழந்தார். இதையடுத்து களமிறங்கிய டிரிஸ்டன் ஸ்டப்ஸ் 4-வது பந்தில் பவுண்டரி அடித்தார். 5-வது பந்தை வீணடித்தார். கடைசி பந்தில் 7 ரன் தேவை என்ற நிலையில் ஃபுல்டாஸாக வீசப்பட்ட பந்தை ஸ்டப்ஸ்லாங் ஆஃப் திசையில் சிக்ஸர் விளாச தென் ஆப்பிரிக்க அணி 17 ரன்களுடன் சூப்பர் ஓவரை முடிக்க ஆட்டம் மீண்டும் டை ஆனது.
இதையடுத்து 2-வது சூப்பர் ஓவர் நடத்தப்பட்டது. இதில் தென் ஆப்பிரிக்கா முதலில் பேட் செய்தது. அஸ்மதுல்லா ஓமர்ஸாய் வீசிய ஓவரில் தென் ஆப்பிரிக்கா 23 ரன்களை குவித்தது. ஸ்டப்ஸ் ஒரு சிக்ஸர் உட்பட 7 ரன்கள் சேர்க்க டேவிட் மில்லர் 2 சிக்ஸர்கள் உட்பட 16 ரன்கள் விளாசினார். 24 ரன்கள் எடுத்தால் வெற்றி என்ற நிலையில் ஆப்கானிஸ்தான் பேட் செய்தது.
கேசவ் மகராஜ் வீசிய முதல் பந்தை வீணடித்த முகமது நபி அடுத்த பந்தில் ஆட்டமிழந்தார். இதையடுத்து களமிறங்கிய ரஹ்மனுல்லா குர்பாஸ் தொடர்ச்சியாக 3 சிக்ஸர்களை பறக்கவிட்டார். கடைசி பந்தில் 6 ரன் தேவையாக இருந்த நிலையில் கேசவ் மகாராஜ் வைடாக வீசினார். இதனால் 5 ரன் தேவை என்ற சூழ்நிலையும் பவுண்டரி அடித்தால் போட்டி மீண்டும் டை ஆகும் நிலையும் உருவானது.
ஆனால் குர்பாஸ் அடித்த பந்து பாயின்ட் திசையில் டேவிட் மில்லரிடம் கேட்ச் ஆனது. முடிவில் தென் ஆப்பிரிக்க அணி வெற்றி பெற்றது. அந்த அணிக்கு இது 2-வது வெற்றியாக அமைந்தது. இரு வெற்றிகளின் மூலம் 4 புள்ளிகளை பெற்றுள்ள தென் ஆப்பிரிக்க அணி தனது பிரிவில் 2-வது இடத்தில் உள்ளது.
2-வது விரைவு அரை சதம்
தென் ஆப்பிரிக்க அணிக்கு எதிரான ஆட்டத்தில் ஆப்கானிஸ்தான் அணியின் ரஹ்மனுமல்லா குர்பாஸ் 26 பந்துகளில் அரை சதம் அடித்தார். இதன் மூலம் அவர், டி 20 உலகக் கோப்பையில் குறைந்த பந்துகளில் அரை சதம் அடித்த 2-வது ஆப்கானிஸ்தான் வீரர் என்ற பெருமையை பெற்றார். இந்த வகையில் கடந்த 2014-ம் ஆண்டு தொடரில் ஹாங் காங் அணிக்கு எதிராக ஷஃபிகுல்லா ஷின்வாரி 24 பந்துகளில் அரை சதம் கடந்திருந்தார்.
குயிண்டன் டி காக் ‘737’
டி20 உலகக் கோப்பையில் ஆப்கானிஸ்தான் அணிக்கு எதிரான ஆட்டத்தில் தென் ஆப்பிரிக்க அணியின் குயிண்டன் டி காக் 59 ரன்கள் விளாசினார். இதுவரை அவர், டி 20 உலகக் கோப்பை தொடரில் 737 ரன்கள் குவித்துள்ளார். இதன் மூலம் உலகக் கோப்பை வரலாற்றில் அதிக ரன்கள் குவித்த தென் ஆப்பிரிக்க வீரர் என்ற பெருமையை பெற்றார். இதற்கு முன்னர் டி வில்லியர்ஸ் 717 ரன்கள் குவித்திருந்தார்.