டி20 உலகக் கோப்பை 2026 தொடரில் சாம்பியன் பட்டம் வென்ற இந்திய கிரிக்கெட் அணிக்கு ரூ.131 கோடியை பரிசுத் தொகையாக அறிவித்துள்ளது இந்திய கிரிக்கெட் கட்டுப்பாட்டு வாரியம் (பிசிசிஐ).
கடந்த 8-ம் தேதி அன்று அகமதாபாத் நகரில் உள்ள நரேந்திர மோடி கிரிக்கெட் மைதானத்தில் நியூஸிலாந்து அணியை இறுதிப் போட்டியில் 96 ரன்களில் வீழ்த்தியது சூர்யகுமார் யாதவ் தலைமையிலான இந்திய அணி. இதன் மூலம் டி20 உலகக் கோப்பையை மூன்றாவது முறையாக வென்ற முதல் அணி, கோப்பையை அடுத்தடுத்த தொடர்களில் தக்கவைத்த முதல் அணி, சொந்த மண்ணில் பட்டம் வென்ற முதல் அணி என்ற வரலாற்று சாதனையை இந்தியா படைத்தது.
“இந்த வெற்றியின் மூலம் ஐசிசி ஆடவர் டி20 உலகக் கோப்பையை மூன்று முறை வென்ற முதல் அணியாக இந்தியா அறியப்படுகிறது. இதன் மூலம் டி20 கிரிக்கெட் பார்மெட்டில் வெற்றிகரமான அணி என்பதை இந்தியா நிரூபித்துள்ளது. இந்திய கிரிக்கெட் கட்டுப்பாட்டு வாரியத்தின் தரப்பில் அணி வீரர்கள், பயிற்சியாளர் என அனைவருக்கும் வாழ்த்துகள்” என பிசிசிஐ செயலாளர் தேவஜித் சைகியா வெளியிட்டுள்ள அறிக்கையில் தெரிவித்துள்ளார். அதில் தான் ரூ.131 கோடி பரிசுத் தொகை குறித்த அறிவிப்பு இடம்பெற்றுள்ளது. முன்னதாக, பிசிசிஐ தலைவர் மிதுன் மனாஸ் அணிக்கு வாழ்த்து தெரிவித்திருந்தார்.
இந்த ரூ.131 கோடியை உலகக் கோப்பை வென்ற அணியில் இடம்பெற்ற 15 வீரர்கள் ஒவ்வொருக்கும் தலா ரூ.6 கோடி கிடைக்கும். அது போக மீதமுள்ள ரூ.41 கோடி பயிற்சியாளர் குழு மற்றும் அணியின் இதர குழுவினருக்கு வழங்கப்படும்.
கடந்த 2024-ல் ரோஹித் சர்மா தலைமையிலான இந்திய அணி டி20 உலகக் கோப்பை சாம்பியன் பட்டம் வென்றது. அப்போது அணிக்கு ரூ.125 கோடி பரிசுத் தொகை வழங்கப்பட்டது. அந்த தொகையை கொண்டு அணியில் இடம்பெற்ற வீரர்கள் ஒவ்வொருவருக்கும் ரூ.5 கோடி வழங்கப்பட்டது.