சந்தீப் ரெட்டி வங்கா இயக்கத்தில் பிரபாஸ் கதாநாயகனாக நடிக்கும் படம், ‘ஸ்பிரிட்’. இதில் த்ரிப்தி திம்ரி நாயகியாக நடிக்கிறார். தென் கொரிய நடிகர் மா டாங்க் சியோக், விவேக் ஓபராய், காஞ்சனா உள்பட பலர் முக்கிய கதாபாத்திரங்களில் நடிக்கின்றனர்.
தெலுங்கு, தமிழ், இந்தி, கொரியா உள்பட 8 மொழிகளில் உருவாகும் படம் இது. இதில் பிரகாஷ் ராஜ் முக்கிய கதாபாத்திரத்தில் நடிக்க இருந்தார். அவருக்கும் இயக்குநருக்கும் கருத்து மோதல் ஏற்பட்டதாகவும் படப்பிடிப்பில் வாக்கு வாதத்தில் ஈடுபட்டதாகவும் இதனால் படத்தில் இருந்து அவர் விலகிவிட்டதாகவும் சில வாரங்களுக்கு முன் கூறப்பட்டது. ஆனால், அதை அவர் மறுத்திருந்தார்.
“ஸ்பிரிட் படத்தில் இன்னும் என் காட்சிகளுக்கான படப்பிடிப்பு தொடங்கவில்லை. வாட்ஸ்-அப் தொழிற்சாலைகள் கற்பனை கதைகளைப் பரப்புகின்றன” என்று கூறியிருந்தார். இந்நிலையில் ‘ஸ்பிரிட்’ படத்தின் நடிகர்கள் லிஸ்ட்டில் அவர் பெயர் இடம்பெறவில்லை. இதனால் அவர் படத்தில் இருந்து விலகிவிட்டார் என்று கூறப்படுகிறது.