ஊழலுக்கு வழி வகுக்கும் தற்காலிக ஆசிரியர் பணி அமர்த்தும் திட்டம் – தேமுதிக தலைவர் விஜயகாந்த் !

தமிழக அரசுக்கு தேமுதிக தலைவர் விஜயகாந்த் கண்டனம் தெரிவித்துள்ளார். தற்காலிக ஆசிரியர்களை பணியமர்த்தும் செயலை கைவிடவேண்டும். இந்த செயல் ஊழலுக்கு வழி வகுக்கும் அதனால் உடனே தமிழக அரசு கைவிட வேண்டும்.

காலிபணியிடங்கள்

தமிழகத்தில் உள்ள அரசு பள்ளிககளில் மொத்தம் 13,331 காலிபணியிடங்கள் உள்ளதாக பள்ளி கல்வித்துறை அறிவித்துள்ளது. மேலும், காலிபணியிடங்களில் தற்காலிக ஆசிரியா்களை நியமிக்க முடிவு செய்தது தமிழக அரசு. பள்ளிகளில் தற்காலிக ஆசிரியர்களை பணியமர்த்த பள்ளி மேலாண்மை குழுவிற்கு அதிகாரம் வழங்கபட்டது.

குழப்பம்

இந்த அறிவிப்பு பல வேலையில்லா பட்டதாரி ஆசிரியர்களுக்கும் இல்லம் தேடி கல்வி திட்டத்தில் பணியாற்றி வரும் ஆசிரியர்களுக்கும் மிகுந்த மகிழ்ச்சி தந்துள்ளது. ஆனால் அந்த காலிபணியிடங்களை பற்றிய தகவலை எவ்வாறு தெரிந்துகொள்ளவது என்ற குழப்பம் ஏற்பட்டது.

விஜயகாந்த் கண்டனம்

இந்த தற்காலிக ஆசிரியர் பணி நியமன அறிவிப்பிற்கு பல அரசியல் கட்சித்தலைவர்கள் கண்டனம் தெரிவித்திருந்தனர். நாம் தமிழர் கட்சி ஒருங்கிணைப்பாளர் சீமான், மக்கள் நீதி மய்ய தலைவர் கமலஹாசனை தொடர்ந்து தேமுதிக தலைவர் விஜயகாந்தும் அரசுக்கு கண்டனத்தை தெரிவித்துள்ளார்.

விஜயகாந்த் வெளியிட்டு அறிக்கையில், ‘தமிழகத்தில் காலியாக உள்ள ஆசிரியர் பணியிடங்களுக்கு தற்காலிக ஆசிரியர்களை நியமனம் செய்வது என்ற அரசின் முடிவை நான் கடுமையாக கண்டிக்கிறேன்.

கடந்த 2013 , 2014, 2017, 2019 ஆகிய ஆண்டுகளில் தமிழ்நாடு அரசு நடத்திய இடைநிலை மற்றும் பட்டதாரி ஆசிரியர் பணிக்கான ஆசிரியர் தகுதித்தேர்வில் வெற்றி பெற்றவர்கள் 60 ஆயிரம் பேர். இவர்கள் அனைவரும் கடந்த ஒன்பது ஆண்டுகளாக அரசு ஆசிரியர் பணிக்காக காத்துக் கொண்டு இருக்கின்றனர்.

அவர்களுக்கு முதலில் பணி வழங்கப்பட வேண்டும். இது திமுகவின் தேர்தல் வாக்குறுதியில் ஒன்று. மேலும், இந்த கல்வியாண்டில் அரசு பள்ளிகளில் மாணவர்களின் சேர்க்கை அதிகரித்துள்ளதை தமிழக அரசு நினைவில் வைத்து கொள்ள வேண்டும். எனவே தகுதித்தேர்வில் தேர்ச்சி பெற்றுள்ள ஆசிரியர்களுக்கு அரசு பள்ளிகளில் நிரந்தர ஆசிரியர்களாக பணி அளிக்க வேண்டும்.