‘மகான் 2’ உருவாகுமா? – இயக்குநர் கார்த்திக் சுப்பராஜ் பதில்

‘மகான் 2’ உருவாகுமா என்ற கேள்விக்கு இயக்குநர் கார்த்திக் சுப்பராஜ் பதில் அளித்துள்ளார்.

புதுமுகங்களை வைத்து திரைப்பட விழாக்களுக்காக படமொன்றை இயக்கி வருகிறார் கார்த்திக் சுப்பராஜ். அதற்குப் பிறகு யாருடைய படத்தினை இயக்கவுள்ளார் என்பது இன்னும் முடிவாகவில்லை. இதனிடையே, விழா ஒன்றில் கலந்து கொண்டார் கார்த்திக் சுப்பராஜ்.

அவரிடம் ‘மகான் 2’ உருவாகுமா என்ற கேள்வி எழுப்பப்பட்டது. அதற்கு “மகான் 2-ம் பாகத்திற்கான ஐடியா இருக்கிறது. அதனை உட்கார்ந்து எழுத வேண்டும். அது 2027 அல்லது 2028-ம் ஆண்டு எதிர்பார்க்கலாம்” என்று கார்த்திக் சுப்பராஜ் தெரிவித்தார்.

2022-ம் ஆண்டு நேரடியாக ஓடிடி தளத்தில் வெளியான படம் ‘மகான்’. கார்த்திக் சுப்பராஜ் இயக்கத்தில் வெளியான இப்படத்தில் விக்ரம், துருவ் விக்ரம், சிம்ரன், பாபி சிம்ஹா, சனத், வாணி போஜன் உள்ளிட்ட பலர் நடித்திருந்தனர். இதன் 2-ம் பாகத்தின் ஐடியா இருப்பதாக கார்த்திக் சுப்பராஜ் கூறியிருப்பது, விக்ரம் ரசிகர்கள் மத்தியில் பெரும் உற்சாகத்தை அளித்திருக்கிறது.